• Representantes do Goberno español, a Generalitat Valenciana e o Concello da capital do Turia, xunto coa Fundación Naturgy e a UIMP coincidiron hoxe en que atallar o problema da contaminación urbana é prioritario para mellorar a calidade de vida das persoas.

  • A Generalitat Valenciana dedica uns 700.000 euros anuais ao mantemento da Rede Valenciana de Vixilancia e Control da Contaminación Atmosférica.

Representantes do Goberno, a Generalitat Valenciana e o Concello de Valencia, xunto á UIMP e a Fundación Naturgy, participaron esta tarde na apertura do foro tecnolóxico ‘Bases científico-técnicas para a mellora da calidade do aire en España’. Unha trintena de expertos, reunidos ata o xoves en Valencia, abordarán dende diferentes perspectivas o problema da polución atmosférica que afecta a 9 de cada 10 persoas que vive nunha cidade, segundo a OMS.

Para a subdirectora xeral de Calidade do Aire e Medio Ambiente Industrial do Ministerio para a Transición Ecolóxica (MITECO), Maj Britt Larka, “a calidade do aire que respiramos é un motivo de preocupación para as Administracións responsables, especialmente en áreas densamente poboadas. A OMS considera que a contaminación do aire é unha causa principal de morte prematura e enfermidade a ámbito mundial, ao aumentar a incidencia dun número importante de doenzas respiratorias, cardiovasculares ou inmunolóxicas.” Por todo iso, aseverou que “debemos dedicar os esforzos necesarios, a todos os niveis, para non defraudar o ambicioso propósito de mellorar a nosa calidade do aire.”

 Neste sentido, o MITECO elaborou o Programa Nacional de Control da Contaminación Atmosférica, co obxectivo de reducir as emisións dos principais contaminantes:  dióxido de xofre (SO2), óxidos de nitróxeno (NOx), compostos orgánicos volátiles non metánicos (COVNM), amoníaco (NH3) e partículas finas (PM2,5), en dúas fases, para 2020 e para 2030. Este programa xa foi sometido ao trámite de participación pública e información a interesados. Actualmente estanse a analizar as alegacións recibidas.

700.000 euros anuais para o control da contaminación ambiental na Comunitat Valenciana

A Generalitat Valenciana estivo representada na apertura das xornadas por Joan Piquer Huerga, director xeral de Cambio Climático e Calidade Ambiental, que resaltou que “ao falar de calidade do aire, é frecuente dirixir a atención á obtención dun maior número de medicións de contaminantes, pero non hai que perder de vista que o obxectivo de medir é dispoñer de datos de calidade para adoptar medidas que eviten ou limiten, no posible, a emisión de contaminantes á atmosfera e así conseguir un aire máis limpo”.

“A contaminación por ozono, dióxido de nitróxeno e partículas ten un impacto importante na saúde”, afirmou Piquer, por iso, xornadas como as destes días “son de grande axuda na toma de decisións nas políticas ambientais de mellora da calidade do aire”. Piquer tamén explicou que “a Generalitat Valenciana dedica uns 700.000 euros anuais ao mantemento da Rede Valenciana de Vixilancia e Control da Contaminación Atmosférica, para renovar equipos de medición, incorporar novas estacións de control e realizar campañas de medición adicionais en diferentes municipios da Comunidade Valenciana co fin de resolver problemas específicos”.

A directora xeral da Fundación Naturgy, María Eugenia Coronado, asegurou que “non existe unha solución única para mitigar as emisións de gases contaminantes nas cidades, por iso cómpre analizar e estudar as mellores medidas para implantar en cada cidade, tendo en conta os aspectos sociais e intrínsecos de cada contorna urbana, as alternativas tecnolóxicas e de combustibles máis sostibles para cada uso, e a relación entre o custo, beneficio e prazo de implantación de cada medida versus os resultados”.

“Con xornadas coma estas, a Fundación Naturgy quere favorecer esta análise e estudo para contribuír non só á busca de solucións, senón tamén á sensibilización de todos os cidadáns ante a necesidade de mellorar a calidade do aire”, afirmou Coronado.

Pola súa banda, Agustín Domingo Moratalla, director da Universidad Internacional Menéndez Pelayo en Valencia, puxo en valor o papel das institucións académicas nos retos da sociedade como o que abordan as xornadas destes días en Valencia. Moratalla afirmou que “a urxencia da sostibilidade en todas as áreas do coñecemento e a investigación non pode manterse nos laboratorios ou as revistas científicas. Urxe unha reforma que deben liderar conxuntamente as Administracións públicas e a sociedade civil”. Para iso, segundo Moratalla, “as universidades desempeñan un papel central porque sen transmisión, transferencia e divulgación, a sociedade civil, a opinión pública e, en xeral, os medios de comunicación non accederían a traballos técnicos ou investigacións académicas”.

Giuseppe Grezzi, concelleiro de Mobilidade Sostible e Espazo Público do Ajuntament de València, destacou que a pesar das dificultades que moitas veces se encontran as Administracións para adoptar medidas concretas para acoutar a contaminación, en Valencia se deron pasos importantes, como a creación dunha Autoridade de Transporte Metropolitano de Valencia, para coordinar todo o relacionado co transporte. Así mesmo, reclamou un sistema de financiamento axeitado para acometer as transformacións necesarias que melloren a calidade do aire, co fin de facer fronte ao reto de defender un dereito universal como é a saúde das persoas.

Unha trintena de expertos e tres días de debate

O Foro tecnolóxico ‘Bases científico-técnicas para a mellora da calidade do aire en España’ ten lugar dende hoxe ata o xoves en Valencia, da man da Fundación Naturgy, a Universidad Internacional Menéndez Pelayo (UIMP), a Generalitat Valenciana e o Instituto de Diagnóstico Ambiental e Estudos da Auga do CSIC (IDAEA-CSIC). Unha trintena de expertos debaten sobre como atallar a contaminación urbana para preservar a saúde das persoas.

A contaminación do aire representa un importante risco ambiental para a saúde das persoas e a diminución dos seus niveis pode incidir directamente na redución da morbilidade por accidentes cerebrovasculares, cancros de pulmón e neumopatías crónicas e agudas. Así o indica a Organización Mundial da Saúde (OMS), que sinala que só unha de cada dez persoas vive nunha cidade que cumpre cos valores guía de calidade do aire.

As propostas para tratar de mitigar a contaminación urbana son múltiples en función das características de cada cidade. Administracións, empresas e a comunidade científica están a avanzar na adopción de medidas, pero é necesario seguir afondando nas causas, medicións e propostas de actuación necesarias para loitar contra este problema que afecta ás nosas cidades, de aí a importancia deste foro especializado de alcance nacional.

O obxectivo destas xornadas é analizar as causas da baixa calidade do aire que temos actualmente nas nosas cidades e as consecuencias negativas para a saúde humana. Expertos de toda España debaterán sobre o estado actual e poñerán en común plans de mellora e propostas de actuación que se están a desenvolver. Entre os relatorios previstos, falarase tamén de como avanzar na elaboración dos inventarios de emisións e trataranse problemas específicos como o ozono e a queima de biomasa.

Fundación Naturgy e a súa vocación de sensibilización ambiental

Estas xornadas forman parte das actividades de formación que a Fundación Naturgy realiza en distintas cidades españolas sobre temáticas relacionadas coa enerxía e o medio ambiente. Dende o debate serio e rigoroso, o seu obxectivo fundamental é promover o uso racional dos recursos enerxéticos e fomentar un desenvolvemento sostible.

A Fundación Naturgy, fundada en 1992 pola compañía enerxética, tamén desenvolve programas de acción social, tanto no ámbito nacional como internacional, incidindo especialmente en actuacións destinadas a paliar a vulnerabilidade enerxética.

 

Valencia, 11 de xuño de 2019